أكورا بريس حبيباتي لي كتعاني من الكلف أو بقع فالوجه عندي ليك اليوم ماسكي المفضل أو الماسك الوحيد الي اقتنعت بيه لحد الساعة…كيصفي الوجه و يهنيك من البومضات الغالية الثمن.
مكونات الوصفة :
1/2 كاس حلبة مطحونة
1/2 كاس فول مطحون
1/2 كاس حمص مطحون
1/2 كأس حليب نيدو
ماء ورد لجمع الماسك
تجمعي كل هذه المقادير و تخلطيها مزيان وتوضعيها في قرعة ديال الزجاج وملي تبغي تستعملي القناع ما عليك غير تاخدي ملعقة صغيرة من الخليط وتجمعيها بشوية ماء ورد وتدهني بيها وجهك وعاتلاحظي بلي وجهك بدا تايتجبد غير صبري حوالي 15 حتى 20 دقيقة.
عاد غسليه بصابون الطوس أو الكف وانت تاتغسلي وتحكي فيه حتى يتقشر مزيان وتزول منو الجلد الميت مسحي وجهك بفوطة رطبة ودهنيه إلى كان النهار بشي كريم مرطب وإلى كان الليل دهني بزيت اللوز.. وصدقوني غاتلاحظي الفرق سيدتي من التجربة الأولى وما غادياش اتخلاي على هاد الماسك الي عطاتو لي امي بعد ما لاحظت بلي تانضيع فلوسي على الخوا الخاوي وبلا فائدة وهي تقول لي: أبنيتي انت ديري هاد الشي الي كنا تانديروه ووجاهنا باقين لدابا زوينين وانتوما بنات ليوم الله يهديكم وخلاص شحال عزيز عليكم تخسرو فلوسكم على البومادات الحامضات هههههه.
